غير مصنف

دقة قلب.. لسه روحى ساكنة فيه

تصوير : آخرون

بيتنا القديم.. رغم السنين

لسه الحنين بياخدنى ليه

بيتنا القديم.. رغم الفراق والاشتياق

أنا لسه روحى ساكنة فيه

لسه فاكرة لعبتى ولون الحيطان

لسه فاكرة خبطتى فوق البيبان

لسه فاكرة شنطتى

واصحابى وولاد الجيران

كان المكان جدًّا بسيط

لكنه مليان بالحنان

لسه شايفة صورة أمى

لسه سامعة صوت أبويا

لسه حاسة بحضن أختى

يوم خناقى ويا اخويا

لما شفته بالسجاير

لسه فاكراها المراية

لسه رابطاها الضفاير

فاكرة أوضتى.. كل حاجتى

جزمتى ولون الستاير

فاكرة أول يوم وضوئى

حتى شوقى للصلاة

فاكرة أول يوم صيامى

كنت حابة للحياة

فاكرة أول ضربة ليا

لما كانت بالحزام

لما بدءوا يفهمونى

يعنى إيه كلمة حرام

فاكرة روكسى.. وابن سندر

فرحتى جوا الترام

فاكرة لبسى ف عيد صغير

والعيدية ف عيد كبير

فاكرة فستانى القصير

والأغانى بصوت منير

لما أول مرة كلنا..

جوا كنتاكى ف سفير

والجناين والقهاوى

والسهر ويا الحكاوى

والكنافة والقطايف

فاكرة لعبى بالفانوس

والأدان بعديه بنشرب..

تمر هندى وعرقسوس

كان زمان الحب طارح

والصفا مالى النفوس

منطقتنا طول حياتنا..

حاجة واحدة وإيد ف إيد

والعلاقة والصداقة..

حاجة أقوى من الحديد

والأهالى قلب واحد..

فرح واحد

حزن واحد..

دم واحد ف الوريد

صوت الأدان.. جرس الكنيسة

عِشرة كانت بالأصول

ناس بتجمع بينها لقمة..

عيش وملح وصحن فول

كل شىء ماشى بهداوى

حاجة أحلى من الحلاوة

بالإيمان والصبر عاشوا

واللى يصبر كان ينول

بيتنا أصبح شىء مضلم

(بيتنا أصبح روح تظلم)

والسواد ع الحيط معلم

بيتنا كشّر مش بيفرح

بنلاقيه على طول مبلم

بيتنا حاوطاه الغرابة

حاجة أشبه بالخرابة

واما باسأل إيه حصل له

السؤال مالهوش إجابة

الشاعرة منى جلال

 

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى